Прэзідэнт Беларусі Аляксандр Лукашэнка 5 чэрвеня ва ўрачыстай абстаноўцы адкрыў Гродзенскую абласную клінічную бальніцу. Кіраўнік дзяржавы перадаў галоўнаму ўрачу стацыянара сімвалічны ключ ад будынка і разам з іншымі ўдзельнікамі цырымоніі перарэзаў чырвоную стужачку. 

05.06.2026г. Прэс-служба Прэзідэнта Рэспублікі Беларусь

Звяртаючыся да ўдзельнікаў цырымоніі, сярод якіх урачы, супрацоўнікі бальніцы і будаўнікі, Прэзідэнт падкрэсліў, што гэта медыцынскі комплекс сучасны, сусветнага ўзроўню. У той жа час ён зроблены без празмернасцей, але аптымальна для аказання якаснай дапамогі.

"Тут з'явіўся сучасны, сусветнага ўзроўню еўрапейскі комплекс, - сказаў Кіраўнік дзяржавы. - Гэта бальніца звернута ў будучыню".

"Мы адзіная краіна, дзе на дзяржаўным узроўні мы захавалі ахову здароўя", - падкрэсліў Прэзідэнт, дадаўшы, што гэта нязменная пазіцыя адзін час крытыкавалася. У тым ліку ў 2020 годзе гучалі заклікі, нават ад медыкаў, перайсці на страхавую медыцыну. "Сёння, дзякуй богу, усе зразумелі, што такое страхавая медыцына і што такое наша медыцына, за якую дзяржава адказвае", - звярнуў увагу ён.

"Я тады ведаў: калі б мы пайшлі шляхам страхавой медыцыны, не было б медыцыны, - падкрэсліў Аляксандр Лукашэнка. - Але вы думалі, што страхавая медыцына - гэта ў тры-чатыры разы зарплата вышэйшая, усё будзе добра. Мы загубілі б медыцыну".

У той жа час Аляксандр Лукашэнка не выключыў, што праз некалькі дзясяткаў гадоў цяперашняя дзяржаўная сістэма аховы здароўя будзе вымушана мяняцца і многія паслугі калі-небудзь стануць платнымі. Цяпер жа гэту нагрузку нясе на сабе дзяржава. Адзін з прыкладаў - аперацыі па трансплантацыі, кошт якіх бывае сотні тысяч долараў для іншаземцаў і бясплатна для грамадзян Беларусі. "Так заўсёды не будзе. Таму трэба клапаціцца аб сваім здароўі. Не трэба глядзець на замежныя мадэлі. Не трэба глядзець, што да вас прыедуць (замежныя спецыялісты. - Заўвага) вас тут вылечаць. Або нехта паедзе і там будзе лячыць і лапатай грошы заграбаць. Там, дзе шмат плацяць, там і расходы іншыя", - звярнуў увагу Кіраўнік дзяржавы.

Прэзідэнт заўважыў, што быў перыяд, калі ўрачы з Беларусі паспрабавалі і паехалі за мяжу, а праз час зразумелі памылковасць гэтага рашэння і стараюцца вярнуцца назад. "Беражыце сваю зямлю. Нікому мы там не патрэбны. Там калі ёсць нейкае вузкае цікавае месца - там свае зоймуць", - сказаў Аляксандр Лукашэнка.

У працяг тэмы Прэзідэнт параіў усім не толькі чакаць дапамогі і падтрымкі дзяржавы па якіх-небудзь пытаннях, але і разлічваць на ўласныя сілы, браць больш адказнасці, асабліва за сваё жыццё і здароўе. "Некаторыя людзі, ведаеце, заводзяцца і пачынаюць... Я гавару: у люстэрка (паглядзі. - Заўвага) і адкажы сам сабе: ты што зрабіў для таго, каб было лепш? Жорстка для Прэзідэнта, але гэта так. Таму вы на начальнікаў глядзіце, патрабуйце з іх, але і на сябе глядзіце", - рэкамендаваў Аляксандр Лукашэнка. 

Прэс-служба Прэзідэнта Рэспублікі Беларусь