"З Вашага пункту гледжання, якая сітуацыя на мяжы? Натуральна, пад вуглом эканомікі перш за ўсё. Як вы выконваеце асноўныя свае абавязкі па фарміраванні дзяржаўнага бюджэту ў той сферы, за якую вы адказныя?" - абазначыў ключавыя пытанні Кіраўнік дзяржавы ў пачатку сустрэчы.

Прэзідэнт нагадаў, што некаторы час таму адбылося пераразмеркаванне функцый і паўнамоцтваў паміж дзяржаўнымі пагранічным і мытным камітэтамі. У сувязі з гэтым Аляксандр Лукашэнка пацікавіўся, як ідуць справы: "Што адбываецца ў сувязі з гэтым? Ці ёсць нейкія насцярожанасці? Можа, мы недзе памыліліся?"

"Я хацеў бы, каб Вы далі ацэнку нашым дзеянням і (далажылі. - Заўвага.) як вы дзейнічаеце па напрамку супрацьдзеяння санкцыйным мерам з боку Захаду, - прадоўжыў беларускі лідэр. - Захад увёў супраць нас санкцыі. Мы адказалі. На вас ускладзена самая асноўная функцыя на пярэднім рубяжы, у эканоміцы - па кантролі за выкананнем мерапрыемстваў антысанкцыйнага характару, гэта значыць нашы меры ў адказ. Як яны сёння ў нас выглядаюць? Што адбываецца ў сувязі з гэтым?"

Паводле інфармацыі ДМК, за 2022 год у рэспубліканскі бюджэт паступіла Br5,8 млрд. мытных плацяжоў. Праз мытную граніцу ЕАЭС у Беларусь праехала больш за 951 тыс. грузавых аўтатранспартных сродкаў, аб'ём перамешчаных тавараў склаў 12 млн.т. Больш як у тры разы павялічылася колькасць перамешчанага легкавога транспарту - з 321 тыс. адзінак да 1,2 млн. адзінак. Сёлета плануецца завяршыць рэканструкцыю 7 аўтадарожных пунктаў пропуску: "Брэст", "Макраны", "Беняконі", "Катлоўка", "Відзы", "Грыгараўшчына" і "Новая Рудня".

З пачатку 2022 года ў бюджэт ад праваахоўнай дзейнасці мытных органаў паступіла больш як Br38 млн, што на 38 працэнтаў вышэй за паказчыкі за аналагічны перыяд мінулага года. Перарвана 266 фактаў незаконнага перамяшчэння наркатычных сродкаў і псіхатропных рэчываў, узбуджана 127 крымінальных спраў, канфіскавана каля 500 кг наркатычных сродкаў, псіхатропных і моцнадзейных рэчываў. Выяўлена 60 фактаў незаконных дзеянняў у дачыненні да зброі, боепрыпасаў і выбуховых рэчываў, узбуджана 6 крымінальных спраў, затрымана 267 адзінак зброі і боепрыпасаў.

Што датычыцца мер, што прымаюцца мытнымі органамі для процідзеяння санкцыйнаму ціску, то ў ДМК нагадалі аб устаноўленай у Беларусі забароне на перамяшчэнне па яе тэрыторыі грузавых аўтамабіляў краін Еўрасаюза (гэтая мера прынята ў адказ на ўведзеныя з боку ЕС санкцыі ў дачыненні да беларускіх і расійскіх транспартных кампаній). . Для перамяшчэння тавараў у недружалюбныя краіны або з іх магчыма перачэпка або перагрузка грузаў у 18 спецыяльна ўстаноўленых месцах, дзе могуць адначасова знаходзіцца амаль 2,2 тыс. грузавых аўтамабіляў. Штосутачна праходзіць каля 1 тыс. перачэпак і 400 перагрузак.